'E mmargarite (1926)

Na margarita 'o nnammurato 'a coglie

e a' sfronna... Si, ma no cumme facc'j'....

Me faccio 'o cunto, conto tutt' 'e ffoglie

e so' sicuro ca me dice: "Si!"

E tutt' 'e juorne, faccio 'o sulitario,

ne saccio tante, a modo mio, gnorsì.

Si nun me torna, si vene cuntrario,

j'mbroglio 'c ccarte e' o faccio dì ca sì.

Si 'o sulitario 'o faccio senza mbroglie,

che dice tu? Putesse riuscì?

E si 'a sfrunnasse senza cuntà 'e ffoglie,

faie tu c' 'a margarita dice: "Si?"

'O rraù (1947)

'O rraù ca me piace a me

m' 'o ffaceva sulo mammà.

A che m'aggio spusato a te,

ne parlammo pè ne parlà.

Io nun songo difficultuso;

ma luvàmmel' 'a miezo st'uso.

Si, va buono: cumme vuò tu.

Mò ce avéssem' appiccecà?

Tu che dice? Chest'è rraù?

E io m' 'o mmagno pè m' 'o mangià...

M' 'a faje dicere na parola?

Chesta è carne c' 'a pummarola.

Fantasia (1956)

Pigliammoce sta vita cumme vene,

llassammo for' 'a porta 'a pucundria,

mparammece a campà c' 'a fantasia:

nce sta cosa cchiù bella pè campà?

'A fantasia se sceta ogne matina

comme si fosse prencepe rignante,

affonna 'e mane aperte int' 'e brillante

e nun s' 'e ppiglia: che s' 'e ppiglia a ffa?

E che curredo tene! Nu mantello

ca luce cchiù d' 'o sole e nun è d'oro;

quanno se mena ncuollo stu tesoro,

abbaglia 'a vista: nun se può guardà.

Pò tene nu relogio cumpiacente,

cu sissanta minute d'allegria,

mmiez' 'o quarante liegge: FANTASIA

e fa tà-tì, tà-tì, nun fa tì-tà...

Quanno parlo cu te (1966)

A parlà c' 'a luna e ' sole

songo buone tutte quante:

nnanz' 'a luna tu te ncante

e te miette a ragiunà.

Spicialmente 'a luna chiena

me risponne a tuono, a ssisco,

e me dice: "Te capisco,

saccio che ne' vuluto dì".

Nnanze a te pure me ncanto,

tu però, quanno me siente,

nun capisce 'o riesto 'e niente!

Ma sta luna, fusse tu?

Penziere mieje... (1948)

Penziere mieje, levàteve sti panne,

stracciàtev' 'a cammisa, e ascite annuro.

Si nun tenite n'abito sicuro,

tanta vestite che n'avit' 'a fa?

Menàteve spugliate mmiez' 'a via,

e si facite folla, cammenate.

Si sentite strillà, nun ve fermate:

nu penziero spugliato 'a folla fa.

Currite ncopp' 'a cimma 'e na muntagna,

e quanno 'e piede se sò cunzumate:

un'ànema e curaggio, e ve menate...

nzerranno ll'uocchie, primm' 'e ve menà!

Ca ve trovano annuro? Nun fa niente.

Ce sta sempre nu tizio canasciuto,

ca nun 'o ddice... ca rimmane muto...

e ca ve veste, primm' 'e v'atterrà.

Roma (1970)

L'orario e 'a strada pè truvà pace e cammenà cuieto,

pè fà capì a te stesso cumm'è 'o penziero ca tu tiene ncapa,

si sàpe 'e sale si ha pigliato 'e fummo si vale 'a pena invece

d' 'o penzà, a Roma chesta strada ce sta sempe.

'A truove sempe 'a strada 'a piazza 'o vico:

se trova all'alba 'e juorno 'e notte, sempre.

Attuorno siente 'a musica d' 'e vvoce,

pè llaria 'a luce e ll'ombra d' 'e pparole:

parole grosse e chelli piccerelle.

Truove 'e muntagne 'o verde d' 'a campagna

'e ccase d'oro ca se fanno rosse pò 'e ramma,

cumm'attone e doppo 'agiento...

Te truove overamente ncopp' 'o munno

cuieto e sulo stanno ncumpagnia

e stienne 'o passo nzieme c' 'o penziero.

A... B... C... D... (1930)

Nu fugliett' 'e quaderno aggiu truvato

ncopp' a nu marciapiede. Pè capì

che steva scritto me l'aggiu pigliato.

Lettere grosse e storte: A... B... C... D...

Mille quaderne, mille guaglincielle:

scriven' eguale, 'o stesso, a chell'età.

Però quanno se fanno grussicielle,

stu carattere eguale chi t' 'o dà?

Nun capisco, se guastano p' 'a via,

nun trovano cchiù pace... ma pecché?

Stùriano pè cagnà calligrafia

e ognuno scrive cumme vò parè.

Ce hanno criato 'e na manera sola,

chi cagne è pè superbia, t'ho dich' j'...

'E guaglincielle, quanno vann'a scola,

scriveno tutte eguale: A... B... C... D...